Oleh: Raja Purba | 19/12/2008

PANGULU BALANG

Haporseaon ni angka ompunta najoloi tagoari doi animisme, manang jotjot tabege agama sipelebegu. Mangihuthon haporseaon nasida, molo mate jolma gabe ma tondina. Digoari pinompar ni na mate i do begu ni natorasna manang ompungnai parsimangotan (sumangot ni ompu). Molo sundut naung leleng ompu naung mate i, begunai digoari “parsadaan” (Ompu Parsadaan). Mate do ninna muse begu i, gabe sombaon ma i digoari.
Ala hadatuon do najolo sada parbinotoan na tumimbo, jadi sude do jolma najolo i marguru hadatuon. Ala datu i do nagabe parsoara oloan, gabe dianggap ma i raja. Asa dianggap datu bolon, ingkon adong do pinungkana ima “pangulubalang”.
Tohonan (fungsi) ni pangulubalang i di namamungka: ”suruanna i tu musu (manapsap daro mata) jala taoar ni na mamungka”.
Pangulubalang i halak na asing do i ditompa. Adong do na tinumpa i dakdanak, adong na magodang. Andorang so ditumpa jolma i dilehon do nasa pangidoanna lumobi na margoar sipanganon. Tangkas do jolo sai ditona-tonai jala dipadan-padani. Di hata-hata i mai asa ringgas suruanna manopsop daro mata ni musu na gabe taoar di ibana, jala pinompar ni datu i do na gabe pinomparna. Dipadan-padani do i asa unang olo paboahon goarna. Dung tangkas nasida masioloan i pe asa ditumpa. Dung ditumpa jolma i, dibuat ma agongna dung diparsiragong dohot miakna. Dibahen ma tu bagasan guriguri; sada inganan ni agongna jala sada nari inganan ni miakna. Ditonahon datu i do tu pinomparna asa disimpan guriguri.

Ala naung ditonahon panumpa tu na tinumpana i na gabe pinomparna i, pinompar ni namanumpai gabe boi ma pangulubalang i siar (sandar) tu pinomparna. Molo siar pangulubalang i sai pangarimason do i. Jala olo do pangulubalangi mandok :
“Husopsop ma?”
Sude natoropi mangalusi :
”Tongka Ompung”
jala olo muse mandok:
“Hudok ma?”, dialusi angka na torop ma ibana :
”Tongka Ompung”.
Jala olo muse mandok :
”Ima tutu”.
Tung sai dielek-elek di nasiar i asa mahap manortor jala asa dipangido di ibana (sipanganonna).
Asa molo siar pangulubalang i, pintor diparade do dengke na niura na balga, gara (tarugi na galak), sira, pege di atas ni bulung ni pinasa, aek sipoting, dohot pira ni manuk sada. Jotojot do datu mangulpuk na marsahit, naeng mangido ninna pangulubalang. Pintor songon naholsoan do napature-ture na marsahit molo ro ulpuk na songoni.
Ditonggo ma natinumpa i dohot na manumpa asa manghorasi, jala dilehon ma baga-baga molo malum sahit i. Disangkothon ma gual-gual songon baga-baga, na ingkon pukkulonna gondang molo dung malum sahit i.


Responses

  1. Looks like you are a real professional. Did ya study about the matter? *lol*

  2. Not actually…..


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: